發展局常秘細佬監察大佬？

【明報專訊】未能連任立法會議員嘅民主黨李永達，沉寂幾個月後，近日同幾位專業人士及大學時期嘅學生會戰友組成智庫「土地監察」。唔講唔知，原來智庫嘅司庫韋志堅，係發展局常秘韋志成嘅細佬，豈非係「細佬監察大佬」？


加盟智庫私下唔傾公事

阿達話，佢早就知韋志堅同韋志成係兩兄弟，但強調邀請韋志堅加盟唔係想攞料，仲話韋氏兄弟向來私下都唔傾公事。阿達同韋志堅識於微時，當年佢做港大學生會外務副會長時，韋志堅就做評議會主席，兩個人喺1980年代更合組「公共政策研究中心」，只係後來佢當選區議員後，因工作太忙而解散。


韋氏兄弟外貌「餅印」一樣，志堅就話，佢做開銀行，覺得可以將股票市場監管股市嘅制度，引入樓市監察發展商。細佬咁講，唔知負責土地政策嘅大佬志成會唔會考慮下呢？