鄧淑德撐委員會唔多梁粉

【明報專訊】被指係「梁粉組織」嘅香港明天更好基金噚日搞傳媒茶叙，喺特首選舉期間任梁振英（CY）競選辦副主任鄧淑德（Karen），以基金會行政總裁身分見記者，自然成為傳媒追訪目標。日前獲委任為古物諮詢委員會委員嘅Karen被質疑資歷唔夠，佢就反駁話自己一直係博物館諮詢委員會委員，都算有跟開古物工作，仲力撐話各個委員會都唔係真係咁多梁粉喎。


同CY有定期見面

Karen話，政府想喺諮詢會聽多啲唔同意見，所以委任唔同界別嘅人入去古諮會係正常做法，否則大可委任晒班古物專業人士入去，就咁跟方程式做嘢就得。對於外界批評梁振英上任後，委任大批梁粉作政治酬庸，Karen就笑言覺得好好笑，「支持梁振英嘅就叫梁粉，唔支持佢但被委任嘅就叫無間道，冇獲委任嘅就叫深乜營（唐營）！」


被問仲有冇同梁振英見面，Karen即刻面露尷尬之情，話基金係梁振英嘅智囊團，點都有定期見面嘅。佢唔肯評論曾經係「頭號梁粉」嘅劉夢熊爆料一事，但就話唔擔心對方一旦再爆料時會燒到佢嗰度喎。