陳智思畫展 畫一國兩制同國教

【明報專訊】行政會議成員陳智思（Bernard）即將同媽咪同侄女第三次搞畫展，Bernard自己會有24幅作品，其中9幅係上年下半年畫嘅，涉及國民教育、一國兩制、政府總部等題目，咁敏感？Bernard笑言，大家活喺敏感時代，佢都唔驚得咁多，而且佢畫嘅抽象畫，究竟幅畫係乜嘢意思，留畀大家自己演繹喇。


敏感時代唔驚得咁多

好似國教咁，Bernard話當日最熱門嘅字眼係「洗腦、洗腦」，所以佢就畫咗個腦出嚟；至於一國兩制嗰幅呢，原來係先畫畫、後諗題目，幅畫係一條路連接隧道，Bernard話，香港落實一國兩制遇到唔少問題，繼續走落去究竟會係點呢？無人知喎，原來幅畫係咁嘅意思。


讀大學時Bernard喺美國加州Pomona College選修藝術，仲自創塗改液點畫，搞畫展係因為同樣愛好藝術嘅媽咪想個仔陪，再搵埋侄女參與，嚟一個三代畫展，今次第三次搞，再加多5個家族成員，展覽將於本月16號至21號喺香港大會堂低座展覽廳舉行。