盛品儒稱魔童為友

【明報專訊】亞視執行董事盛品儒同城電主席王維基係歡喜冤家，盛品儒舊年控告王維基，涉嫌喺任亞視行政總裁期間盜取亞視商業機密，但盛品儒最近接受樹仁大學《仁聞報》二月號訪問時，就形容自己同王維基係「朋友」，盛品儒話佢嘅行動係「對事唔對人」；佢又話，以前唔少亞視老闆做兩三年就走，但自己就「甚至希望可以做一世」。


「願做一世亞視」

查實魔童上年出席商台搞嘅名人講座時，都講過同盛品儒係「好朋友」，仲好風趣咁話，若果對方叫佢去「自首」，佢願意同盛品儒一齊去警署。盛品儒對樹仁同學講，查實佢都好佩服王維基，仲同王食過幾次飯，所以先當對方係「朋友」！


但「朋友」來勢洶洶，盛品儒諗住點樣應戰？盛品儒話希望可以同友台合辦晚會或綜合節目，又話「對前路好有信心」，希望兩年內可以轉虧為盈咁話。