陳健波豪擲3000買舊嘢

【明報專訊】立法會舊大樓有唔少用咗幾十年嘅家具，好似酸枝枱櫈，早前秘書處舉行拍賣，睇吓議員有無興趣要。可能呢啲陳年家具有紀念價值，各議員好似都幾鍾意，保險界陳健波更加買咗幾樣，擺喺立法會辦公室，甚至連垃圾桶都買埋，認真搞笑。


舊立會家具搶手

喺陳健波個辦公室入面，無論從垃圾桶到畀客人坐嘅兩張酸枝櫈，以至書枱、掛西裝用嘅高身衣帽架都好古色古香，原來全部都係舊大樓物品。


唔好以為舊嘢一定平，陳健波就用咗成3000蚊收買呢幾樣嘢，最抵嘅係垃圾桶，都要約200蚊；最貴嘅就係兩張櫈，總共要1200蚊。


陳健波話最鍾意係櫈，買時指明一定要買兩張，其他議員出價只係幾百，佢就出到成1200蚊，咁落本，梗奪得心頭好啦。