國泰助基層單親家庭起飛

【明報專訊】漫畫中麥太因為家貧冇得帶阿仔麥兜搭飛機，唯有帶佢坐山頂纜車，模擬高空睇香港美景，當係坐咗飛機去馬爾代夫；現實中，國泰近期就搞咗個「空中之旅」計劃，幫嚟自低收入單親家庭嘅200人圓飛行夢，等佢哋可以喺本月27日活動中搭國泰航機，喺香港上空遨遊個半鐘。


Emily噚日聽國泰講起，呢個計劃幾年前搞過，近年留意到基層尤其單親家庭最需要幫助，決定encore。國泰同5個NGO合作，由機構協助喺東涌、荃灣、葵涌、深水埗等基層地區搵啲有需要、未曾一家人搭過飛機嘅家庭，等佢哋可以有開心回憶。


各家庭會好似外遊咁辦手續、候機、用膳、試用機上娛樂設施，但為免要出境引致不必要手續同費用，航班會喺香港上空翱翔，亦會有機師空姐等義工陪佢哋，講解吓航空資料。