議員變「影后」有段古

【明報專訊】大家有冇發覺，呢幾日電視新聞播立法會會議時有啲怪，唔少立法會議員發言時都係背面上鏡。原來，立法會喺周三同噚日嘅會議「試驗」只提供「會議和手語傳譯合併信號」畀電視台，結果唔少電視台為咗唔播出有手語嘅畫面，改用自己拍嘅片段，但好多「好位」已經畀立會官方電視台佔據，議員就係咁變咗「影后」。


電視台唔吼手語信號

據講，呢個建議係由一位資深泛民議員，喺早前嘅行政管理委員會提出。我哋問過屬於行管會嘅資深議員工黨何秀蘭（Cyd）同民主黨主席劉慧卿，都話呢個係行管會嘅集體決定。阿Cyd透露，原來周三同噚日嘅試驗前，立法會秘書長陳維安曾打電話問過行管會成員。


秘書處話，收到兩封信，有多間電視台對立法會只提供「會議和手語傳譯合併信號」表達關注。秘書處強調今次係試驗，又確認秘書長問過成員意見。雖然阿Cyd噚日話「唔怕一個人揹晒」，但據我哋了解，提出建議嘅人唔係佢，而係另有其人。只提供有手語信號嘅試驗噚日結束，行管會話日後會有檢討。