賭業大亨身家 升幅贏地產大亨

【明報專訊】一年一度嘅福布斯香港富豪榜噚日開榜，李嘉誠再冧莊，個人資產暴升624億港紙達到2340億元，漲幅達36％。而榜單頭4位排名不變，仍是地產商天下。十大富豪中，身價升得最猛嘅要數銀娛（0027）主席呂志和。憑藉銀娛股價屢創新高，呂志和身價喺一年內翻一番，至741億港元，排名由第8位急升至第5。


《福布斯》就話，由於過去一年恒生地產指數升咗38個巴仙，地產商過咗一個大肥年，令到今次50大富豪中，接近三分二嘅人嘅大部分資產都係由地產投資賺得。


呂志和因銀娛 由第8躍升至第5

今年頭4名亦由長實（0001）主席李嘉誠、恒地（0012）主席李兆基、新地（0016）郭炳聯、郭炳江及其家族以及新世界（0017）創辦人鄭裕彤包辦。每人身價都有顯著升幅，其中誠哥表現最佳，一年內身價漲咗624億銀。女士方面，賭王千金何超瓊排11，四太梁安琪則排24，殼后朱太排第35。


超瓊四太分佔11及24位

今年富豪榜另一個特點係，名單由40名增加到50名。因此有唔少新面孔出現，包括排名第41嘅李錦記第三代傳人李文達。而唯一一位落榜嘅係舊年病逝嘅棉紗大王「陳廷驊」，他嘅資產暫時列入家族名下，排第12。榜單中只得4位富豪身價縮水，而50位富豪全部都進入10億美元（78億港元）富豪行列，相比舊年，40位富豪中仲有3位未能成為10億富豪，證明舊年的確係一個豐收年。