范太收火：唔方便講CY

【明報專訊】港區全國人大常委范徐麗泰向來以敢言見稱，更多次發言批評同揶揄特首梁振英（CY），有指中央對佢有啲微言。噚日Emily同唔少記者行家一樣，期待范太對CY被彈劾嘅高見，點知范太收晒火，話自己孭住人大個身分，唔方便講咁多喎。嘩，如果呢個真係理由，范太喺特首選舉前後有好多言論都唔應該講啦！


話與中央神經無關係

范太噚日同好多政商界人士雲集四季酒店，出席「百仁基金」新一屆會董就職禮。被追問點睇CY被彈劾時，范太拒絕評論CY嘅表現，話彈劾特首係《議事規則》賦予議員嘅權力，無論佢同意與否，都會尊重泛民行使呢個權力。咁CY喺立法會被指講大話一事又點計先？呢個時候，范太開始想走人，叫記者問番市民好過，仲推搪話﹕「我講嘢好難會冇咗人大身分，所以唔會再評論！」佢又話，唔知CY被彈劾會唔會驚動中央嘅神經，事關「中央嘅神經同我冇乜關係！」


范太喺剛過去嘅人大選舉低票當選，更有傳佢嘅出位言論令佢冇得冧莊做常委，唔通佢今次收火同保住常委個位有關？范太就話常委呢啲位從來都冇得「爭取」。


傳升常委 肥胡：何德何能

噚日同場嘅，仲有醫管局主席胡定旭同恒地副主席李家傑等被指有望「升呢」做政協常委嘅人士，肥胡就自嘲「何德何能」，李家傑就話睇報紙先知有啲咁嘅傳聞呀。