罕有金鼠蛇迎蛇年

【明報專訊】仲有一個月就到蛇年，有商場搞《新春百萬蛇皇展》，其中只有300萬分之1機會出現變色嘅金黃色日本金鼠蛇（圖），同埋罕見嘅金滕蛇等7條「蛇王」，會喺今個月底提早同大家「拜年」。


借出蛇種嘅馮先生話一般日本鼠蛇呈灰綠色，展出嘅日本金鼠蛇因為體色變異呈金黃色，屬極稀有「無價寶」，「當年我用20萬買BB蛇番嚟，後來有人出60萬我都唔賣！」金鼠蛇擅長爬樹，頭部呈四角形，身體兩邊鱗片較粗糙，成年蛇可有1米長。另一條金黃色變異金滕蛇亦會同大家見面，馮先生話呢種蛇主要分佈喺馬來西亞，身形細長，平日鍾意食青蛙。


蛇展本月26日至31日喺大埔超級城C區美食坊舉行，白化直紋皇帝蛇、黑白皇帝蛇、琥珀粟米蛇、豬鼻蛇同犀牛鼠蛇亦會同場展出。


（葉家豪攝）