CY同建制派頻飯局

【明報專訊】特首梁振英喺《施政報告》前放大假，大家都以為佢會放軟手腳，原來佢喺放假前已出招，一早約咗建制派1月3號喺中總食飯。食飯可能人少啲，傾得唔夠喉，CY向建制派廣發英雄帖，邀請佢哋下月5號到禮賓府共聚。嘩，隔一日就見一次？


查實CY當選後已搞過一次答謝會，不過當時擔心畀人話有延後報酬，所以只喺尖沙嘴街坊福利會大禮堂舉行，無酒水食物提供，今次轉去禮賓府，相信可以真真正正舉杯慶祝。加上CY就嚟公布施政報告，當然要搞好關係。


有建制派中人話，相信CY今年仍然會繼續做公屋免租、綜援雙糧等惠及最低層嘅政策，但公開派錢以往有爭論，未必會再做。通常政府正式公布政策前會先向建制派放風，但有政黨話局方未向佢哋探聽，相信放假後政府先會努力爭取支持。