「係疏忽唔涉誠信」

【明報專訊】一向撐特首梁振英（CY）嘅長遠房屋策略督導委員會成員蔡涯棉，可能想爭住做「頭號梁粉」，噚日又出公開信鬧泛民提彈劾動議，仲轟泛民「待自己人寬大 律梁振英嚴苛」，取笑泛民連一篇簡單嘅彈劾議案內容6次搞錯日期，27個泛民都走漏眼咁話。


泛民彈劾聲明 尋6錯處

蔡涯棉已經唔止一次發出公開信同喺報章撰文撐CY，佢今次就睇唔順眼泛民搞彈劾CY。佢話，睇泛民嘅彈劾聲明，發現文件中有6處提及立法會CY出席答問大會嘅日期出錯，例如2012年12月10日錯寫12月9日。佢話，若係一兩處出錯，可理解為手民之誤或打錯字，但6處有錯，仲要係由多名資深法律界人士撰寫，之後27個泛民議員閱讀後同意聯署，咁就真係離譜啲咁話。佢話呢班議員連10幾日前發生嘅事都記錯，理解佢哋係疏忽，最多都係嚴重疏忽，唔涉誠信。佢話CY間屋僭建係11、12年前發生，記錯答錯資料，同樣唔應該話CY誠信有問題喎。


蔡涯棉仲話，泛民今年報「7•1」遊行人數有40萬，而港大民意計劃公布嘅數字只係9.8萬，警方就話11.2萬，佢反問泛民係咪蓄意「報大數」同誤導，有無涉及誠信問題？

蔡涯棉「勇」字掛心口鬧泛民，但佢都話想「懇切呼籲泛民議員能夠回心轉意」，話咁先係市民嘅福祉喎。