人代新丁陳勇請願請上癮

【明報專訊】啱啱當選港區人代嘅陳勇噚日現身政府總部，但佢唔係搞人代工作，而係以「新界社團聯會理事長」呢個身分，同埋一班議員向政府請願。新界社團近一年好活躍，立法會選舉前佢哋成日去政總請願，幫候選人爭取曝光。選舉完之後，佢哋話唔想停低，仲定下指標，要每星期都要「返工」去政總一次，每次諗個議題請願，向政府提出意見喎。


新社團一行近約20人，拎埋一包包肥牛、魚、蔬菜等新鮮食材去政總，唔講清楚，仲以為佢哋買餸打邊爐。其實佢哋只係去請願，話近期有「地溝油」問題爆出，要求政府加強食物安全監管。呢類型嘅請願行動，一向無乜傳媒採訪同報道，但陳勇話無所謂，佢哋自己會影相，然後放喺會訊上面畀會員睇，等會員知道佢哋做過乜。


每星期一次 籲會員關心社會

陳勇話請願請上癮，所以就算立法會選舉後，都會安排每星期搵齊人請願一次，「唔想做動物園裏面嘅動物」，要會員多啲出嚟關心社會喎。