黃碧雲自嘲撳錯掣

【明報專訊】又到聖誕，又到聖誕！多個政黨同官員今年出電子版賀卡，民主黨嘅電子卡就由6個Q版立法會議員粉墨登場，拍咗一套聖誕「大電影」。


套片用咗立法會主席曾鈺成「剪布」時嘅名句「返嚟就郁」作引子，CY就瞌埋眼話僭建「唔存在」，連長毛掟蕉嘅經典場面都有。曾鈺成按一個掣，即刻有個玻璃罩幫特首CY擋晒，長毛仲被公仔鉗夾走埋。


盟友何俊仁見到咁，化身「憤怒鳥」（Angry Bird），由彈叉射向玻璃。不過，Emily最讚嘅都喺立法會新丁黃碧雲，佢之前喺休會辯論行會成員林奮強事件嘅議案中，一嚿雲咁撳錯掣投咗棄權票，結果令議案以一票之差被否決。佢喺呢段片中終於按啱掣，就喺按個掣將CY彈出「門常開」。Emily都好佩服佢自嘲嘅勇氣。


至於政務司長林鄭月娥嘅聖誕卡就簡單得多，只係用咗佢官邸做背景，連佢嘜頭都無。