新聞類別
港聞
詳情#
【明報專訊】泛民主派去選港區人代，落選係意料中事，但難得佢哋好認真落場，好似公民黨前黨員司馬文，噚日帶埋兩個囝囝司馬俊、司馬賢到場拉票，噚日朝早氣溫只有12℃，司馬文話叫兩個仔起身都有少少難度，要喺牀拉佢哋出嚟，不過兩個仔就話一直都好願意同爸爸拉票！Emily一睇，嘩，司馬文兩位公子都幾有型。
不滿遲獲選委聯絡方法
司馬文話雖然明知無機會當選，但今次參選仍獲益良多，尤其係參與咗好多港區人代簡介會，聽咗好多參選人嘅意見，對港區人大呢個圈子多咗了解。不過，佢仍然好不滿作為新候選人，好遲先拎到選舉會議成員嘅聯絡方法，仲話問過多個現任港區人代包括羅范椒芬，對方都話無呢啲聯絡資料。查實現任人代羅太又點會無資料？恐怕都只係唔想泄密啫，最終司馬文要上星期三下晝3點先拎齊選委聯絡資料。
之前爆料話中聯辦有投票名單嘅香港中小企業聯合會創會會長佘繼標，噚日就喺會展場外拉起橫額，話要同選舉會議成員致歉，因為遲起步，拎唔到電話同選委聯絡，佢最後落選咗。
橙牌陣撐顏寶鈴
至於中總常務會董顏寶鈴，就派咗幾十人嘅助選團舉起橙色紙牌拉票，驟眼睇仲以為係某日式快餐店做推廣優惠
留言 (0)
