Google政治人搜尋榜 唐唐人氣贏CY

【明報專訊】2012年快過去，呢一年政壇發生好多事，梁振英（CY）擊敗唐英年做特首，但係論人氣，唐唐就贏番一仗，喺Google嘅2012年最熱門關鍵字（Zeitgeist）「政治人物」排行榜，唐唐榮登第一，畀唐唐鬧「你呃人」嘅CY第二，而輸咗立法會議席引來網民開香檳慶祝嘅劉江華，估唔到都爭到第三！至於陳志全（慢必）同競選拍檔袁彌明就齊齊入圍人氣十大。


劉江華爭到第三

2012年都算係政治年，除咗特首選舉同政府換屆，仲有立法會選舉，而10項最多人搜尋嘅政治話題分別係：立法會選舉、六四事件、十八大、釣魚台、國民教育、拉布、最低工資、生果金、雙非，同埋置安心計劃。


Google亦公布十大人氣名人搜尋榜，排榜首係韓星Psy，其次係NBA球星林書豪（Jeremy Lin）。同時，Psy演繹嘅《江南Style》歌舞登上十大社會話題搜尋排行榜首位。