教協方景樂撐劉曉波一人響應

【明報專訊】港區人大代表選舉下周三（19日）舉行，呢期各候選人都忙於出席選舉論壇或活動拉票，噚晚社聯就搞咗個簡介會，有近40個候選人出席。會上教協候選人方景樂，攞住釋放劉曉波、劉霞嘅聯署信，搵其他候選人聯署，即場只有一個候選人肯簽，就係前公民黨員司馬文。佢話都有派信畀3個重量級現屆人代，包括范徐麗泰、譚惠珠同埋羅范椒芬，3人反應迥異。


范徐：唔簽 羅范：大原則同意

方景樂話，范太話明唔會簽，只會用自己方法處事；珠姐就唔出聲無回應；羅太就話大原則同意，但信件字眼要斟酌。方景樂喺會上大談平反六四、釋放民運人士嘅政綱，台下總算有零聲支持者嘅掌聲。


香港金融業志同會前晚都搞咗場政綱簡介會，仲有44個候選人參加，候選人仲多過出席嘅選委，而方景樂同司馬文都獲邀出席。有份參選人代嘅陳智思係志同會嘅會董，所以係佢主場，要禮讓其他出席者先講，自己排到最後介紹政綱。不過，由於出席候選人太多，每人講3分鐘都已經搞到好晏，所以唔設答問環節。