曾浩輝學珠寶鑑證

【明報專訊】陳漢儀醫生今年6月升任衛生署長後，一直好忙，噚日終於得閒同傳媒飯敘。做到今個月底就「裸退」嘅衛生防護中心總監曾浩輝同衛生署高官都有出席。Emily見到曾浩輝，梗係追問佢離職後有乜打算。曾醫生話，佢對珠寶鑑證好有興趣，逛街時會停喺珠寶店外，估吓櫥窗裏嘅珠寶首飾值幾多錢，若價錢估得接近就會好開心。所以離職之後，佢會用鑑別細菌嘅嚴謹態度學習珠寶鑑證，Emily 聽完真係要講句「真係估佢唔到」。


曾浩輝除咗追蹤細菌病毒叻，仲係鋼琴高手，離職之後，佢會同Band友夾番隊Band。佢仲預告12月份會登台，幫譚詠麟喺演唱會伴奏一曲，替母校華仁書院籌款。由於高官離職都要過冷河，佢會先去澳洲、新西蘭見舊友，同埋揸車玩番一排。


曾醫生同傳媒關係幾好，遲啲會搞個告別派對，陳漢儀笑住話，「真係要搵個球場先至裝得晒曾醫生嘅粉絲」。Emily就祝佢一曲走紅，生活愉快。