吳克儉環境局長上身

【明報專訊】教育局長吳克儉噚日環境局長上身，同幾百名教師大談環保教育。佢喺仁濟醫院教育研討會上講到教育局三不政策﹕開會唔提供膠樽水、做活動主禮嘉賓唔戴鮮花襟花、唔收紀念品。


大談教育局環保三不政策

無咗國教科包袱，吳克儉出席教育活動都輕鬆咗好多，好似噚日就響應研討會主題講環保，佢話以前教育局開會，會有好多教育界人士出席，人哋嚟開會，又無錢收，畀支水人哋飲都唔係好過分，但每次開會後，剩低成打成打膠樽，所以教育局決定以後開會唔提供樽裝水。


佢話，各局長可能一日要去兩三場活動，若每次都掛鮮花做襟花，掛一陣就棄掉好浪費，所以，如果係鮮花做嘅襟花佢哋就唔戴，假花就可以接受。


第三環保小錦囊，就係唔收紀念品，佢話香港有中、小學同埋幼稚園等院校成2000幾間，如果每年去一次，每間送一份都唔掂。