大姐大手記﹕娛圈大汗男 基仔安志杰稱王

【明報專訊】大姐大真是很佩服藝人，大熱天時出席活動，一滴汗都不流，鎂光燈猛閃，眼都不眨。不過，都有藝人例外，好似古巨基就出名大汗；早前基仔出席活動，唱歌表演助興後，接受傳媒訪問，其間不停流汗，助手見狀，即遞上紙巾，基仔抹完左邊面，又抹右邊面，但汗水仍從四面八方流出，助手忍不住幫基仔抹汗。不認識基仔的人，會以為他耍大牌，但大姐大可以證實，基仔絕非扮巨星耍大牌，是真的有實際需要。


額頭滴出一串汗

現在很多藝人、歌手都北上搵「人仔」，基仔開心講稍後會在內地工作掙「人仔」，所以年尾的樂壇頒獎禮都不能出席。傳媒打蛇隨棍上，問他是否努力掙錢結婚？他竟然滴汗。傳媒當然不放過他，話女友Lorraine等做古太久已，戥Lorraine慘？基仔聞言不知如何反應，繼續抹汗。不是誇張，大姐大見到基仔額頭中間突然有一串汗滴下來，嚇到記者彈開兩步，基仔手握的錄音筆亦濕晒，見記者攞番支錄音筆時一臉嫌棄，只用兩隻手指夾住，然後用紙巾抹乾。


阿Sa怕醜被窒

大姐大覺得幾搞笑之餘，就想起與鄭伊健合演《我老公唔生性》的拍檔蔡卓妍（阿Sa）；當日在電影宣傳活動上，有記者問阿Sa關於男友陳偉霆（William）的事，阿Sa竟跟古巨基一樣，扭擰話唔知點答；在旁的伊健看不過眼，問阿Sa﹕「都唔係第一次問你啦。」伊健問得好，阿Sa在這個圈這麼多年，為何還怕面對這些感情話題？


講到大汗，安志杰（Andy）拍得住基仔；不要看Andy身材健碩，在電影裏經常演很man、很打得的角色，便以為他是個粗粗魯魯的人，其實他是個怕醜仔，斯文、有禮貌，說話不知幾細聲。


婷婷幫手抹汗

Andy每次出席活動，怕醜的他因為緊張，總是大汗淋漓。有次他與女友謝婷婷以化妝品代言人身分出席發布會，婷婷的父母謝賢（四哥）和狄波拉（拉姑）也來撐場；穿西裝的Andy上台獻花給婷婷時，額頭不停冒汗，婷婷忍不住笑兼公然為愛郎抹汗，但都無用，Andy的汗照樣不停流，連在台下的四哥都忍唔住取笑Andy說﹕「嘩，乜咁大汗！」Andy一落台，助手即遞上紙巾，抹濕幾張紙巾。Andy次次出席活動，次次也如是，大家已見慣不怪。