陳凱欣做食衛局政助

【明報專訊】政府噚日公布委任35歲嘅陳凱欣（圖）出任食物及衛生局政治助理，陳凱欣加入政府前任職now寬頻電視新聞採訪主任，專責醫療新聞，識得唔少醫療界人脈。不過，立法會衛生服務界議員李國麟話，有人話畀佢知陳凱欣喺新聞界時人緣平平，佢話若此言屬實，影響到食衛局推銷或游說政策效果，食衛局就要檢討咁話。


今日到食物及衛生局報到嘅陳凱欣畢業於浸會大學新聞系，又喺浸大攞到傳媒管理社會科學碩士學位，入行超過10年，喺無綫電視新聞部同now寬頻電視打過工，做過高級記者、主播同採訪主任。


陳凱欣做傳媒時，搶先報道多單醫療獨家新聞，但有人話佢有時手法過於「勇猛」。由於陳凱欣同醫管局高層及衛生署當時嘅高層關係良好，有傳媒曾經要求兩個部門發放重大新聞資訊時要透明同公平。


家有幾個副局同政助位仲未填人，政府就話，餘下人選會喺適當時候公布。