龍應台一日跑四場

【明報專訊】正在訪問香港嘅台灣文化部長龍應台，噚日馬不停蹄同文化界會面，一日跑三四個地方。佢噚日下晝去咗伙炭藝術村，參觀幾個工廈內嘅藝術家單位，仲同曾經出戰立法會功能組別嘅工廈藝術家關注組主席周俊輝傾咗成個鐘。


龍部長曾旅居香港9年，當時亦探過工廈藝術家，佢同Emily講，當年去工廈參觀時，已有零散藝術家駐守，但今次返嚟，覺得香港工廈藝術家群體發展完整好多，佢仲大讚周俊輝等藝術家「生命力好強」。


鼓勵藝術家政府多溝通

至於港府成日被批評唔關注文化界需要，龍應台就話唔方便評論，但佢話台灣當年亦走咗一段好長嘅路，先至今日有文化部，佢覺得香港官員對文化嘅觀念改變咗好多，鼓勵藝術家要學習點樣同政府溝通，政府亦要同藝術家溝通，了解佢哋需要，但亦唔可以過度干預藝術家嘅自由。龍應台仲會留港幾日，今日會去港大演講。