研發港產士多啤梨 漁護主任獲嘉許

【明報專訊】公務員事務局長鄧國威噚日向77名來自唔同「環頭」嘅公務員頒發「公務員事務局長嘉許狀」，表揚佢哋對社會嘅貢獻。任職漁護署達33年嘅農業主任陳兆麟，噚日衝出上水大龍實驗農場，到添馬艦接受嘉許，仲向記者娓娓道出佢嘅耕種史。


喺台灣修讀植物病理嘅陳兆麟，大學畢業後加入早年嘅漁農署，積極研究引入改良植物品種、協助農民解決耕種問題，咁多年來，佢最滿意係研發出本土士多啤梨。佢解釋，士多啤梨唔係可以儲存得耐嘅水果，所以過去港人喺香港買到嘅進口士多啤梨，一盒裏面都有幾粒爛，佢其後研發出可供香港種植嘅品種，令大家每逢年頭都可買到新鮮美味嘅本地士多啤梨，「最開心係直接可增加農民嘅回報，又受市民歡迎，農民笑等於我笑」。


渠務工程師樂於捱臭

除咗陳兆麟，渠務署管理值班工程師曾民強同海關總關員陳鎮華亦獲獎。家喺昂船洲污水處理廠值班嘅曾民強話，處理污水係厭惡性工作，但就笑言喺污水廠內唔覺惡心，因為污水已經多到好似海洋咁浩瀚！佢仲話將污染物變成非污染物嘅工作，總需要人做，而佢亦好樂意做，更感激家人多年來嘅體諒。


至於1982年起已喺海上執法嘅陳鎮華，話無論幾風高浪急仍然有人走私，佢亦見證30年來走私嘅演變史，「以前內地好窮，連香港人唔要嘅舊電器都走私，家就全部都係iPhone、iPad同電腦」。