葉劉揭《寒戰》五大誤

【明報專訊】先旨聲明，本文會提及電影《寒戰》劇情。呢套近期好hit嘅港產片，片中講到警隊、廉政公署等話題，唔少人睇完之後評論多多，包括覺得劇中好多情節同現實未必相符。曾經做過保安局長嘅新民黨主席葉劉淑儀，噚日就喺facebook拆解片中幾個同現實唔一樣嘅情節，Emily同大家分享吓。


葉劉提出5點戲中不符現實嘅地方，如戲中咁重大嘅保安事故，現實上應由特首親自主持，啟動保安委員會，由政府高層制訂應對策略，警隊則係負責執行，而唔係全權安排 。


戲中嘅「警花」楊采妮陪同局長一齊見記者，但現實上，陪伴嘅應該係所屬新聞官。葉劉又話，警務處長會向局長同政府高層匯報事件，又話今時今日，局長應該避免講有針對性嘅說話。


警花唔會陪局長見記者

至於喺戲入面嘅同袍互相稱呼「陸先生」呢啲咁見外嘅說話，現實亦唔會發生，葉太話，大家會直接叫局長、阿sir、阿dam（madam），當年佢嘅同事就係叫佢阿dam。至於高層之間，就會直接叫名，好似佢稱呼李明逵做阿Dick、叫曾蔭培做YP等。