耀才分期供股 加番斬倉條件

【明報專訊】耀才（1428）早排推出嘅分期供股計劃突然之間無咗聲氣，噚日管理層終於出嚟解畫。原來係證監會覺得佢哋對於斬倉嘅條款寫得唔夠清楚，所以耀才就同客仔先做登記，未正式開始畀大家「供股」。


行政總裁陳啟峰（Nelson）話，而家加番啲條款，講明其實斬倉條件同借孖展差唔多，今日就可以正式開始畀客仔供股票喇！

如果大家記性好，應該記得耀才主席葉茂林仲有開夜店，得閒仲會炒下舖。噚日佢透露，嚟緊仲會有新搞作。不過佢就好口密，極都唔肯講，淨係話同夜店有少少關係，年尾先至宣布，到時仲唔排除會同夜店生意一齊上巿。問葉生會唔會同人合作，佢就話唔鍾意，仲話合作係分手開始。咦，似乎係暗示緊同之前大股東交銀國際分手事喎。