大姐大手記﹕阿倫見過鬼怕黑唔敢畀貼士

【明報專訊】郭富城（城城）榮升馬主，愛駒「愛的呼喚」係威係勢，之前在沙田馬場第一次上陣就勝出，帶挈城城拉頭馬，還帶挈當日採訪的記者贏錢，連大姐大都有斬獲。不知是否畀面城城，抑或撐城城，個個猛落注，搞到「愛的呼喚」鬼咁熱，派彩不多；雖然如此，但大家都很開心。


大姐大贏少少都如此興奮，其實是有原因的，除了因為是lucky money外，更因為大家被人跣得多。娛樂圈中有很多馬主，亦有不少圈中人喜歡賭馬，他們間中都會畀貼士記者，記者們收到貼士都會買少少，碰吓運氣，但就無次贏，尤其是自認好叻的阿叻，不時話自己贏馬，意氣風發；叫他畀貼士，他就實牙實齒叫買這隻啦、哪隻啦，講到似層層；記者跟他身邊的朋友深信不疑，但次次都失望而回，未贏過。


阿叻貼士無料到

大姐大聽友人講，阿叻真係經常贏錢；但為何他畀貼士不中，箇中原因就不得而知，是否怕個個落注賠率被分薄，只有他自己才知；阿叻的愛駒「莫己若」剛於周日勝出，大姐大就未有收到貼士。


同樣鍾意跑馬仔的譚詠麟（阿倫）就好少畀貼士，因為他鍾意自己刨馬經，隨心所欲去買。年前在活動上，見到阿倫拿着本馬經在度馬，還開心跟大姐大講，話買了隻「哨牙騅」贏了；大姐大對馬一竅不通，取笑他是哨牙倫買中哨牙騅。阿倫懶理被取笑，回味自己眼光獨到。在場記者聽到他贏馬，便問他攞貼士，阿倫便說出自己的心水馬，結果唔中。之後記者在某活動上見到阿倫，一起噓他，話阿倫畀山埃貼士。阿倫尷尷尬尬以笑遮醜，即時向記者道﹕「邊個買咗，我畀番錢你哋。」阿倫都算有良心，自此也很少再畀貼士，最近他的「財神駕到」贏完再贏，阿倫也沒有畀貼士記者。


王晶賭馬鬧笑話

阿叻的老友王晶導演，也是超級馬迷，每逢有賽事，都會馬經不離手，就算開工拍戲都不會錯過落注。有次王晶在拍戲，坐在暗角很肉緊大叫﹕「快啲 、快啲！」在場的演員鄭中基和杜汶澤即刻彈起身，以為被王晶發覺他們又在嬉戲，鬧他們不埋位；之後才發現原來他正在賭馬，叫隻馬快點衝線，他們笑到碌地。