西九12月搞露天音樂節

【明報專訊】西九管理局早前講過，今年底將舉辦連串活動，吸引市民先行感受文化區嘅氛圍。西九管理局表演藝術行政總監茹國烈（Louis）噚日話，12月15日同16日一連兩日，將會喺西九海濱長廊舉辦名為「自由野」嘅戶外音樂節，邀請約25隊國際及本港樂隊，當中已應承演出嘅本地樂隊有14隊，包括演出非洲音樂嘅「Ezo」、本港首隊全女子太鼓樂團「O Daiko」、草根民謠樂隊「Mini Noise」等。


Louis話，音樂節喺嗰兩日每日晏晝3點至夜晚10點半演出，市民可以喺下月中開始網上登記，免費入場。


一連兩日 免費入場

Louis又話，西九面對勁靚海景，有潛質成為世界一流舉辦戶外音樂節嘅場地。佢話今次舉辦有試驗性質，估計同一時間可以最多容納4000幾人，到時場地更會設立兩個舞台，等市民可以無間斷欣賞音樂。如果受歡迎，西九管理局會考慮明年再搞。