長毛認無睇過莫言

【明報專訊】中國作家協會副主席莫言獲諾貝爾文學獎，Emily見社民連梁國雄（長毛）嘅辦公室成個書房咁，梗係想知佢對莫言獲獎嘅睇法。長毛好老實同Emily講，原來佢冇睇過莫言嘅書。佢話，中國作家獲獎，佢都好開心，其實中文好有魅力，如果唔係共產黨對作家有咁多箝制，應該一早就有中國作家得獎咁話。


長毛話，中文係一種好特殊嘅語文，中國作家得唔到諾貝爾文學獎嘅重視，其中一個原因係因為中文真係好難，另一方面，亦因為國家長期打壓作家，唔可以自由寫作。


至於網上有人話莫言係建制作家，無資格獲獎，長毛就唔認同。佢話作家嘅政治態度同人生觀，同佢嘅文學成就無必然關係，佢仲勸勉內地作家唔應該因人廢言。


民主黨主席何俊仁亦話無睇過莫言作品，佢同Emily講，佢係「老一輩人」，睇陳若曦、余光中同陳之藩較多。工聯會王國興就話只睇過莫言小說改編拍成嘅電影《紅高粱》，對莫言唔多熟悉咁話。