卿姐參選 前夫捐10萬

【明報專訊】今日係立法會議員向秘書處申報利益限期嘅最後一日，Emily發現，大力支持民主黨代主席劉慧卿嘅原來係佢前夫、資深大律師潘松輝，捐咗10萬蚊，咁支持前妻，真係「再見亦是朋友」。卿姐向立法會申報，收到55.8萬蚊捐款，佢搵到12個人贊助超過1000蚊，當中唔少知名人士，商務及經濟發展局前局長馬時亨，同埋上海灘創辦人鄧永鏘爵士各捐2萬。


曾經捐錢畀卿姐黨友單仲偕嘅「蘭桂坊之父」盛智文，原來都有捐5萬蚊畀卿姐，真係四圍都見到盛智文政治捐獻嘅身影。另外，卿姐家姐劉麗卿都出咗2000蚊，民主黨同黨友何俊仁就夾埋捐現金同服務，價值接近18萬。卿姐同Emily講，所有捐款都係「揼石仔」問番嚟，不過，善長都係一問就肯捐，而盛智文就成日都會幫民主黨買獎券。


其他名人：馬時亨盛智文

建築、測量及都市規劃界謝偉銓（Tony）都搵咗幾條大水喉，其中，前僱主、英皇集團主席楊受成就「科水」10萬蚊。Tony仲搵到新地副董事總經理黃植榮、測量師行家蔡德群、羅尚平同黃山各捐3萬蚊，身為前同事嘅恒基執行董事黃浩明同地產計劃部總經理梁錦亮就捐5萬蚊。


新民黨副主席田北辰就申報喺馬來西亞有兩幅近9萬平方呎工業用地。