國慶煙花唱紅呼喚愛

【明報專訊】仲有兩個星期就到「十一」國慶，維港又會有煙花匯演，今年大家都關心國民教育，怕小朋友被洗腦，但一年一度國慶煙花，愛國元素當然唔少得。今年國慶煙花由「香港廣東各級政協委員聯誼會」斥600萬元贊助，除咗有「中國」兩個簡體大字會喺半空「爆發」，仲有5粒星同「紅歌」《紅旗頌》伴奏。


描述小童長成愛國者

主辦單位噚日舉行記者會介紹，煙花分為8幕，描述一個小童成長為一個愛國者，3幕以愛為主題，包括「父母親給孩子嘅愛」、「青年人對愛情嘅幻想」同「成年人對終身伴侶嘅愛」，配樂仲有劉德華嘅名曲《愛你一萬年》！

配樂《愛你一萬年》

匯演長23分鐘，將發放23,888枚煙花，大會預計維港兩岸會有40萬人觀賞。除咗香港電台第4台會同步播放背景音樂，市民亦可以去到尖沙嘴文化中心外、星光大道，灣仔金紫荊廣場享受主辦單位提供嘅音響效果。匯演於10月1日晚9點鐘開始，要感受被國家嘅愛包圍，千祈要及早霸位！