永豐金細期佣金7蚊

【明報專訊】萬眾期待嘅QE3一出，股樓齊升，證券行梗係唔放過任何一個吸客機會。早前推3.68元劃一佣金嘅永豐金融集團，噚日又將期貨產品交易佣金減至7元。睇嚟即使張華峯當選金融服務界立法議員，亦都無阻證券行大玩減價戰。


早前推炒股3.68元劃一佣金

點解咁講，因為張華峯當選前就已經話，部分證券行玩割喉式減價，係惡性競爭，因為成本都無咁低，佢仲話支持設立0.25%的最低佣金。


但佢呢頭當選，果頭就撞正美國印銀紙，上星期五港股已升近600點，永豐見勢即推7元期貨佣金，要「期、股雙擊」咁話。


大期期權 佣金收15元

永豐話，減價因為投資者要「食住條水」，減低成本。不過，小琴去佢網站一睇，原來小型恒指同小型國指嘅期貨先係7元，但大期或者期權，甚至啱啱推出嘅人民幣期貨，佣金都要15元。