莊偉茵未上任先去中電學嘢

【明報專訊】過埋暑假就正式過檔中電做企業發展總裁嘅前國泰企業事務董事莊偉茵（Quince） ，雖然未返新工，但噚日喺中電中期業績記者會嘅重要日子，都低調現身，仲好謙咁話嚟學吓嘢。中電請到Quince咁上心嘅員工，真係恭喜晒！


旁聽中電業績記招

一身便服嘅Quince，噚日只係坐咗喺最後幾排嘅角落，全程只係聆聽，亦未有同中電員工交流。記者會完咗，Emily即刻上前同Quince打招呼，佢一貫友善咁寒暄咗幾句，話自己喺國泰已last day咗，仲放緊大假，未正式上任，所以連卡片都無。


佢又話，趁中電公布中期業績，主動到記者會學吓嘢，唔係中電叫佢嚟嘅，所以無乜嘢好講。


聽講Quince喺國泰做到8月10日，做埋業績記者會，之後放3個星期大假，9月返新工，中電嚟緊咁多大嘢同政府拗手瓜，相信Quince有排忙。