同茅于軾飲下午茶 6位共付26萬

【明報專訊】中國著名經濟學家茅于軾（圖）噚日下午搖住扇、拉住夫人向公眾拍賣同佢哋一齊飲下午茶嘅機會，令大家產生無限遐想：「會唔會同股神巴菲特午餐咁，又拍出個天價呢？」最終6位出價最高嘅競拍者一共籌咗25.9萬人仔（下同），買低呢個同茅大師品茶論足嘅機會，呢啲善款全部捐畀民間智庫天則，作為研究經費。


睇嚟經濟學家嘅頭腦的確不同常人：茅生把經濟學中嘅「消費者剩餘」擺上枱，話雖然大家出價唔同，但係畢竟同樣嘅商品，最終出價應該一樣，所以要呢6位茶友各出2萬人仔。但有位競拍者段紹譯點都唔制，一定要畀夠之前競拍嘅出價19.9萬，佢話自己細細個就睇茅老師嘅書，改變咗佢嘅命運，佢要支持茅老師嘅偉大事業喎！


下午茶嘅話題涉及貿易、教育、地產，茅老師嘅智慧令6位競拍者心服口服，大讚「餐下午茶值啊」！