大劉紅顏知己入華置

【明報專訊】小琴平日好少睇娛樂版，對劉鑾雄身邊嘅紅顏知己認識不多。不過家吓佢哋嘅爭風呷醋，似乎已經燒到入大劉嘅公司華人置業（0127），為咗各位小股東嘅福祉，今日就等小琴都嚟講吓八卦新聞啦！


話說1個月前，華置先啱啱委任咗甘比嘅胞姐陳詩韻為執行董事，到咗噚日又再出通告，宣布另一紅顏知己呂麗君都入埋去做執行董事！呢一幕情節，可謂仲曲折過電視劇﹗

與甘比胞姐平起平坐

今次呂麗君入主董事局，將會負責集團響中國大陸同埋海外嘅投資項目，每年有60萬人工，仲有花紅攞。不過呢筆錢比起大劉以前送嘅珠寶、豪宅都算喺濕濕碎，最緊要係可以攞到實權、同對家抗衡嘛！今次呂麗君同甘比個家姐前後腳咁入董事局，仲要平起平坐，唔知係咪大劉要玩平衡呢。


董事局內家族成員眾多

甘比個家姐主要係管集團旗下化妝品牌「雙妹嘜」嘅營銷，驟眼睇佢同呂麗君應該無咩職權衝突，但大家都可以估到以後佢哋董事局開會喺咩情景。目前董事局內，仲有大劉嘅兒子劉鳴煒任職副主席兼非執行董事，以及大劉胞妹劉玉慧做非執行董事。希望佢哋以後能夠平心靜氣咁相處，一齊幫近日已經多嘢煩嘅大劉打理好間公司啦！