Coach殺入Groupon網大平賣

【明報專訊】小琴最鍾意行街買嘢，而且買親嘢都唔輸蝕，必定格個全港至低價先落手，點知今日竟然走咗寶﹗話說名牌手袋嘅Coach（6388）喺Groupon網上大平賣，廿幾款手袋好多半價就有交易，平千幾蚊，有一個甚至減到差唔多4折﹗好野人人愛，唔使幾耐，已有50幾個買家落訂，只剩兩款小琴個人不太喜歡嘅產品，最後小琴乜都冇買到。


廿多款手袋 好多半價

平時啲名牌店為咗保持高貴嘅形象，極少大減價，就算為咗清貨尾，最多做8、9折就算，幾時會好似今次咁樣？前兩日政府出報告話香港零售增長大幅放緩，冇咗自由行遊客帶挈，珠寶、手表、名貴禮品銷售，就由每年雙位數增長跌到得番3.1%。


唔通Coach都有大把貨尾賣唔出，又唔好意思整個特賣場，所以至喺Groupon靜悄悄地出貨？如果真係咁，嚟緊話唔定仲有更多名牌會好似Coach咁，搵機會出貨﹗大家要留意唔好走寶喇﹗