武鋼「招之即來」送外賣

【明報專訊】為咗社會穩定，保障就業，就算市場需求不足，內地鋼企都仍然要繼續生產，導致產能嚴重過剩，唔少企業可以話係生產一噸就蝕一噸。央企武鋼集團見咁樣落去唔係辦法，竟毅然決定兼營送外賣，大家信唔信？反正小琴就信了。


多種服務中心 拓展湖北省

今次武鋼改行，真係同佢哋主營嘅鋼材生產風馬牛不相及，佢哋響武漢成立咗一家叫「招之即來」嘅城市服務中心，而且近乎咩服務都做，好似送外賣啦、公司會議擺花、代訂機票、訂製家具等等，甚至連通渠都做埋；佢哋仲計劃未來兩年將服務範圍擴張到全個湖北省。


不過咁，武鋼都唔係家先走嚟「不務正業」，早響2004年，剛接任武鋼董事長嘅鄧崎琳就已經有呢種打算，事關武鋼員工有成差唔多8萬人，真係做緊鋼鐵業嘅只有2萬人左右，其他員工分佈響非主業部門，以前公司係以鋼材業務賺到嘅錢去倒貼呢班員工，但如今鋼材市場不景氣，呢幾萬員工就變成沉重負擔。


去年非主業收入達600億

所以武鋼好早之前就已經開始佢哋「不務正業」嘅大計，等班非主業員工能夠自己養活自己，好似養豬啦，搞交通運輸啦，而且效果都幾理想，好似去年咁，武鋼非主業收入達到600億元，雖然只係佔總收入唔夠三成，但20.8億元純利就佔咗成個集團六成利潤，好賺過生產鋼材。


話時話，其他同行都不妨考慮下「不務正業」，可能以後小琴有機會見到寶鋼茶餐廳、鞍鋼時裝都唔出奇喎！

email:piano@mingpao.com