人棄我取 彤叔增持銀基

【明報專訊】近排同茅台呢隻國產名酒沾邊嘅人同事運氣好似都麻麻，過氣特首煲呔曾臨別秋波運走一批茅台，即刻被質疑佢想侵吞名酒，而茅台嘅經銷商銀基集團（0886），主席梁國興早排又被人唱，話佢同投行訂立咗啲對賭協議，最後要澄清股價先止跌。


不過銀基終於有啲好消息冲喜吓，原來人稱「沙膽彤」嘅新世界發展（0017）大股東鄭裕彤，喺上個禮拜四即銀基派全年成績表翌日，用成1670萬增持咗510萬股，每股平均價3.276元，持股量由7.64%升至8.07%。


講真，自從今年初內地話禁用公款「隊」 茅台之後，銀基個股價就係咁「隊」，再加埋主席梁國興啲對賭傳聞，令個股價傷上加傷。彤叔喺呢個時候增持，除咗「沙膽」之外，唔知係咪有咩後着呢？