什邡事件令「催淚彈概念股」漲停板

【明報專訊】噚日小琴睇到條微博，話因為四川省什邡事件，深交所一隻叫晨光生物嘅上市公司升到停板，事關呢間公司有生產催淚彈材料，所以大家就乘機炒作呢隻「催淚彈概念股」，不過亦有唔少人話班投資者冇良心，借民眾維權嚟投機搵錢。


公司澄清只用作食品配料

但係咁，呢隻號稱內地唯一「催淚彈概念股」嘅公司人員亦都好快走出嚟解釋，話公司產品主要用嚟做食品添加劑同營養保健品配料，而有一種叫辣椒堿嘅材料雖然可以用嚟製造催淚氣體，但公司產量唔多，亦只係佔全公司收入好細比例，而且佢地只係賣材料，個客用辣椒堿做乜，佢地唔會知道亦管唔着喎。


但解釋咗又點呢，內地股市不嬲都流行炒概念，好似早幾日香港回歸前夕，中央送大禮，內地就炒「前海概念股」。前排中菲黃岩島衝突，軍工股亦炒起，連香港隻廣船（0317）都升埋，更莫講話每次神舟升空，啲航天股就會大熱。所以話，響內地股市，概念呢啲嘢，提不到摸不着，但炒得起。


之不過，噚日始終有人歡喜有人愁，晨光生物就話升到停板，但係導致什邡民眾抗議嘅鉬銅項目，負責嗰間公司宏達股份噚日響A股就要停牌，等待解釋同澄清事件；而且因為當地政府已經下令項目停工，估計宏達股份就算復牌，股價都會受壓下挫。


email:piano@mingpao.com