龔方雄力撐A股 滬指仍連跌6日

【明報專訊】近排中港股市氣氛差到爆，喺呢啲日日都唔知想點嘅時勢，仲堅持做「好友」，其實係好難捱。向來都係A股大好友嘅摩根大通銀行家龔方雄，早排出嚟大力唱好A股，點知近日個市連跌6個交易日，好似摑咗佢一巴咁。


龔方雄無耐之前就話，A股最痛苦嘅時刻已經過咗，家市盈率得嗰十幾倍，散戶唔玩離場嘅話，就揀錯咗時機。佢叫人唔好喺家A股最低點離場，之但係若果散戶真係跟住佢咁做，呢排都真係要擔驚受怕喇。


事關上證綜合指數昨日再跌多5點，收報2217點，由19號開始跌足6個交易日（22日為端午節假期休市），一共跌咗99點。雖然跌幅就唔係話好深，但咁樣慢慢陰乾式下跌，又好難令班散戶有興趣玩落去。