溫州政府省錢賣車 搞到車股跌

【明報專訊】內地成日話要節省公務消費，溫州市政府早幾日就付諸行動，將215部公務車拎出嚟拍賣，總共賣到成千萬人民幣。之不過咁，唔知係咪因為呢200幾輛拍賣嘅公務車都係本田、福士、豐田等等名牌車，市場可能擔心其他地方政府會效法賣車，同埋以後唔再用名車做公務車，搞到噚日啲名車代理股插晒水，好似正通（1728）同中升（0881）就跌咗7%及5%以上。


聽溫州市果邊講，呢次拍賣嘅只係第一批，佢哋地仲有成1100部公務車將要拎出嚟賣，以後公務員要出去做嘢，近嘅補貼，遠就租車；亦有參加拍賣嘅市民話，啲公務名車好抵買，好似有架2004年本田Accord先至賣7萬，比二手市場平好多。


今次地方政府肯節約成本當然係好事，但亦從側面反映，原來佢哋以前真係幾豪花喎。據統計，內地公務車市場一年就成千億元，例如高檔車奧迪，每5部就有一部由政府部門買入。