聯匯之父祈連活 批任志剛脫鈎論

【明報專訊】上個星期金管局前總裁任志剛，發表嘅一篇學術論文討論香港貨幣體制，提議港府可以考慮港元同美元脫鈎，以解決民生問題，搞到一班財金官員個個騰騰震，即刻走出來「撲火」。有「聯匯之父」之稱、景順首席經濟師祈連活都喺《壹週刊》寫咗篇鴻文，三點反駁任志剛嘅論點。


逐點駁斥任志剛論點

祈連活話，首先香港嘅通脹未必由聯匯造成，因為周邊亞洲國家，例如新加坡，都面對通脹問題，甚至嚴重過香港。第二，佢認為美國長期低息及量化寬鬆，唔一定令美元長期弱勢，因為日本雖然都有推行量化寬鬆，但經濟長期處於通縮，而且日圓亦長期強勢；反觀人民幣，佢相信距離國際化仲有好長時間，家港元都係同美元掛鈎好啲。


至於第三個論點，係任志剛話人民幣強勢下，港元跟隨美元貶值，令中港矛盾加深。祈連活認為，發展中國家匯率升幅一向快過已發展國家，就算港元同美元脫鈎，匯率都唔會好似人民幣升咁多。