彤叔5元樓下 溝佐丹奴

【明報專訊】佐丹奴（0709）自從上月底出咗份未符人意嘅首季業績，短短半個月，股價就從業績前嘅6.1元跌至上周四嘅4.9元，跌幅近兩成。不過，作為大股東嘅彤叔一於少理，聯交所披露，彤叔上星期趁佐丹奴跌穿5蚊時靜靜雞吸貨。


近年比彤叔睇中嘅股份唔少，一旦傳出彤叔入股嘅消息，股價一定三級跳。但彤叔有時都係玩玩下，好似隻新環保能源（3989），彤叔熱炒一輪之後減持，股價即打回原形。


不過，即使佐丹奴首季銷售額、毛利率、同店銷售等數據通通下跌，但彤叔趁佢股價跌穿5蚊時，喺上星期五以每股4.989元增持50萬股，共斥資249.45萬元，持股比例增至25.01%。喺大家唔睇好時，彤叔仍然不離不棄，佐丹奴股價亦都好醒神，噚日逆市升3.7％至5.31元。