劉央入貨冇張揚 掃入東吳無潛水

【明報專訊】「亞洲股神」四叔李兆基近年成日話「言多必失」，論股論樓都冇早前年咁「放」。另一位「女股神」劉央近排亦芳蹤杳杳，小琴好多記者朋友都話搵佢唔到， 一改同佢以往喜歡同傳媒交流作風。最明顯例子，莫過於聯交所噚日顯示，劉央喺新股東吳水泥（0695）掛牌當日即上周三，用平均價1.1蚊買咗4496萬股，總共用咗近5000萬銀掃貨。


以往鍾意談論新股

稍為對女股神有啲認識嘅朋友都知道，劉央最鍾意公開論新股，以往每逢有啲新股投資者推介會，好多時佢人未到已聽到劉央爽朗嘅笑聲，然後例必大力推介隻新股，堪稱新股午宴「吉祥物」。


不過，今時唔到往日，佢啲愛股唔少都跌到面目全非，尤其佢成日聲稱話會增持但又唔見有實際行動嘅人和商業（1387），令佢經常成為抽秤對象。可能女股神領略到四叔「言多必失」嘅真諦，所以今次唔聲唔聲入貨，東吳噚日收市價1.11元，喺呢個市况畀牛央搵到隻唔潛水嘅新股，都算係咁咯！