小股東哭訴中銀無人情味

【明報專訊】大部分上巿銀行的股東，同時都係銀行嘅客仔，噚日喺四季酒店舉行嘅中銀香港（2388）股東大會，亦成為部分客戶嘅控訴大會，仲有小股東聲淚俱下轟中銀無人情味。事緣於早前中銀推出母行中國銀行（3988）成立100周年的紀念鈔，吸引200萬人申請，分發過程中一度造成混亂。呢位小股東嘅爸爸亦都有份認購，仲成功抽中，但就好不幸地喺拎到紀念鈔之前，遇到交通意外過身。


講到呢度，呢位小股東已經悲從中來，流下男兒淚。身為大仔嘅佢打算代爸爸領取中銀紀念鈔，當做完成佢嘅遺願，但係中銀就唔畀佢代領，仲話一定要本人先可以領取。小股東話明白中銀嘅做法完全合法，但就少咗啲人情味。


中銀事後補充 有專人跟進

呢位小股東講完佢嘅慘痛經歷後，在場人士同埋睇直播嘅記者都深表同情。最後都係由中銀香港公司秘書陳振英打完場，話而家正檢討緊紀念鈔發行嘅過程，亦都有叫嗰位小股東留低佢啲聯絡資料，話唔定會酌情處理，補番紀念鈔畀呢位小股東。


中銀發言人後來補充話，已經收集咗果位小股東嘅資料，將會有專人跟進，先同佢了解返個情况，再決定點樣處理。


email:piano@mingpao.com