上藥股民大嘆食錯「藥」

【明報專訊】有病最怕食錯藥，因為隨時連小命都不保，但原來買股都一樣怕食錯「藥」，可能會搞到自己焦頭爛額。噚日最受股民關注嘅新聞當然係隻上藥（2607）傳出懷疑造假數，搞到被中證監同港交所齊齊調查，結果係點？大家都有眼睇，上藥A股跌停牌，H股又直插23%，成班中港小股東上網齊齊留言喊慘。


畀人踢爆企業管治咁亂籠，大家都擔心上藥隨時仲有排跌，有股東仲留言感慨自己食錯「藥」，話「早知唔食上海藥，應該改食廣州藥」，咁佢又講得幾有道理喎，同樣係製藥企業，廣州藥業（0874）近排表現真係零舍標青，事關佢嘅母公司廣藥集團啱啱打贏官司，成功拎番王老吉涼茶嘅商標使用權，以後可以順理成章用番王老吉傳統紅罐包裝。


廣藥搶番王老吉 股價3日升17%

王老吉響全國都咁受歡迎，可以想像到廣藥今次贏番個商標，一定大大刺激佢哋涼茶嘅銷路，唔怪得廣藥版紅罐王老吉急不及待要響6月推出，仲估計5年內可以帶來每年300億嘅銷售額。未來前景看好，連帶股價亦都連升3日，前日就升8%，噚日亦升6%，3日加埋前前後後總共升咗成17%。


小琴噚日就專登將上藥同廣藥嘅股價走勢比咗一比，陰公囉，一個向上一個向下，唔怪得之股民要大嘆「食錯藥」啦。


email:piano@mingpao.com