系內公司迴避 超人壓尾陣

【明報專訊】每年4、5月，小琴啲傳媒朋友都忙於出席上市公司啲股東會。唔好誤會，財經記者唔一定係資深股民，去股東會唔係投票，而係企喺門口等，為求喺會前會後見管理層幾面，追吓新聞。不過，記者食白果當食生菜，小琴個friend噚日便連吞三蛋。


話說李嘉誠旗下嘅匯賢房託（87001）、和記電訊香港（0215）、和記港陸（0715）喺佢地頭酒店開股東會，惹來唔少記者喺大堂守候，不過，不論係匯賢、做電訊嘅和記定做玩具嗰間和記港陸，管理層都no show，小琴個friend癡癡地等咗半日後都係空手而回。


其實，長實（0001）同和黃（0013）本周五會喺同一地點開股東會，又係一年一度李嘉誠喺業績會以外同傳媒交流嘅時候，可能超人系公司嘅管理層有晒默契，等老闆壓軸登場，所以噚日集體玩失縱啦。