王維基五十知天命

【明報專訊】「啲人成日話我賺咗50億，但其實係好痛嘅一個動作。好似湊大一個仔，廿幾歲喇，跟住賣咗佢……好有感情，我係一殼眼淚。」人稱「電訊魔童」嘅王維基，噚日喺安永企業家獎嘅啓動禮上面，首次公開剖白「賣仔心情」。


王維基話自己今年啱啱好50歲、「五十而知天命」，為咗培育下一代嘅創意，最後都決定忍痛「賣仔」，做應該做嘅事咁話。小琴一向都幾佩服王生嘅大膽，起碼廿年前佢真係一手一腳，打破電訊市場嘅壟斷。


之不過今次要喺電視界，打破慣性收視就唔係咁易，事關無綫已經開到口話要打官司，到時可能仲要搞好耐先有牌到手。王維基噚日亦講到明，做電視唔一定會好賺錢，更加叫政府要好似廿年前嘅電訊市場政策咁，制定好免費電視嘅政策，咁先有得「二次創業」。


叫政府搞好免費電視政策

講到創業，佢就話自己17歲開補習社，19歲走水貨書，到1979年已經賺咗4萬蚊，「當時對後生仔嚟講，算係好多錢㗎喇」。佢覺得一個人去創業，往往係環境差而逼成嘅，「家生話條件好咁多，我都好難逼到個仔去做」。


經歷過生死 先夠膽創業

「我鍾意經歷生與死之間，因為試過死，先至夠膽做人哋唔敢做嘅事。」佢話自己創業嘅最大動力，就係做前人唔做，或者係覺得好難做嘅事，怪唔知得佢次次都係「偏向虎山行」。最尾佢到底喺電視圈係發光發熱，定係黯然謝幕，要拭目以待，但無論點都係要攞咗個牌先。


email:piano@mingpao.com