會計專家「計錯數」

【明報專訊】舊年獨立股評人David Webb「踢爆」，話首都創投（2324）同埋大股東丘忠航加埋揸住朗力福（8037）超過三成股權又唔提全面收購，證監會噚日就公布，制裁首都創投同埋丘忠航，因為佢哋違反《公司收購及合併守則》規則26.1。


證監指出，舊年6月10日，丘及首都創投增持朗力福股份至合共持有30.19%，觸發《強制收購全面要約》責任，但兩者都冇向朗力福提出全購。


最吸引小琴眼球嘅係，證監引述丘忠航話，佢本人係因為計算錯誤先會買入過多朗力福股份。經友人提醒，丘生會計師出身，四大會計師行其中2間都任職過，唔知係咪以前睇啲數比較複雜，簡單加減數反而難到佢呢？


證監就話，丘忠航雖然知道需要將首都創投及佢自己喺朗力福嘅共同持股量保持喺30%樓下，但無證據顯示佢已認真地實施有效嘅合規程序。中環警察決定向丘忠航施加冷淡對待令，禁止佢直接或間接使用香港證券市場設施，為期18個月，同時公開譴責丘同埋首都創投。