冰說聰明：騰訊fans自求多福

【蘋果日報】
去年股民流行兩句說話:「問君能有幾多愁？沒買騰訊沒買樓。」的確，去年騰訊（700）叱吒風雲，單手已將恒指推上三萬點，股王牛氣沖天，每次調整都是短暫，每次業績也勝預期，手上要分拆的項目又多，似乎找不到瑕疵。行為心理學話，只要將習慣或理念，堅持21天，便會將習慣鞏固成自然，無需意識去控制，咁騰訊在2016年起步，咁長時間的潛移默化，確令大家將「升」變成當然。
時移勢易，騰訊股價從年初高位跌了四成，青冰相信對長情股東來說，只是皮外傷而已，留意返十年前騰訊股價只係8至10蚊，現價仍有近30倍回報。不過青冰更加相信，大部份股民都係升市唔敢追，但今年見頂之後，不斷貪平而撈底，可惜一浪比一浪低，越撈就越低。
上年找不到瑕疵，點知今年就十面埋伏，南非股東配股，阿爺規限打機，手遊收入按季倒退，北水持續沽貨。今年公佈過3次業績，每次都引起唔少人激辯，究竟係唔係勝預期，甚至去爭論GAAP及非GAAP盈利，不過說穿了都係淡友找瑕疵，好友找亮點。前輩教落，股價永遠會走在消息之前，1月及3月兩次升至476元附近水平而見頂回落，南非股東配股觸發跌浪，距今已經超過半年，股價拾級而下，但以上提過的壞消息，都在較後段的時間在才浮面，你亦可以參考下舜宇（2382）的走勢，6月見頂，嚇人業績在8月中先見家翁，邊樣行先，顯而易見吧。
騰訊自04年上市至今，由高位回落逾四成的，過往只有兩次，雷曼時期跌五成，2011年歐債危機時跌39%，今次要跌五成fans們未必太驚，反而更擔心日後可否重振雄風，在國進民退的時代，「訊眾」還是自求多福吧。
青冰
http://fb.com/chingbing888
本欄逢周四刊出