69歲施永青活得盡性　再戰渡海泳

【蘋果日報】【人物訪問】那時候是1976年，文化大革命結束，27歲的施永青人生有一次重要嘗試，不是搞二次革命，而是第一次參加維港渡海泳。
42年後的今天，施永青仍然喜愛「跳海」，明年三月70歲的他，曾自言之後不再參加渡海泳，不過率性的他轉頭說「要游到醫生唔肯寫紙為止」，活出其「盡性生活」之座右銘。
70年代，施永青坦言人命冇咁矜貴，渡海泳不設水試，「嗰時就咁跳落去咋，過一陣先敢伸個頭上水面，好多人喺後面跳落海啊。」當年他瘦骨嶙峋，不諳水性，站在皇后碼頭岸邊預備落水時，「隔籬有個阿叔話：『(o靚)仔，你咁瘦，因住抽筋啊。』」
稱自己有地中海貧血症的施永青，帶氧量不高，「都係意志力㗎咋，去到某個位，身體適應咗，好似第二呼吸咁，持續一段比較長嘅時間。」香港人早年未有環保意識，「游游下水，有舊『米田共』經過。以前啲人咩都扔晒落海。」皇后碼頭游到對面尖沙嘴，「水流幾急吓，見到有人沖咗去西環，有人沖咗去銅鑼灣，當年冇篩選過嘛。」
「游到醫生唔肯寫紙為止」
施永青那個年代尚未發迹，在新昌做office boy，負責影印，「嗰時住荔枝角，好窮，但游泳池要錢㗎，所以去游維港。」施永青小時候游水靠自學，曾經差點浸死，「10歲8歲嘅時候，荔枝角仲有泳棚，本身一直都可以掂地，點知有次潮漲，掂唔到地，好彩嗰時離地不遠，仲搵到個平衡。」
未識死的老施，多年來對水情有獨鍾，一見到水就想跳落去，基本上是不顧規矩，「有次喺希臘，酒店隔籬係海，我就游咗去對面個島，點知係監獄。」另一次是在瑞士洛桑，天氣好凍，「我同天鵝游水，阿女話唔畀我游，唔係驚我有事，因為嗰度寫住話唔可以游水。」又有一次在尼泊爾都跳海，「游游下，我爬咗隻大象上面，好彩冇揈我落嚟。」
「旅行見到水就會游，遊山玩水，我真係玩緊水！」好多人去旅行只會影相留念，游水係五官體驗，「喺陸地上有重力，但喺水入面就好似飛緊咁，你要上就上、落就落，唔受日常煩惱影響。」
「明年已70歲，唔係游得幾耐，年紀大，體力衰退，踎低起身都要搵嘢扶下。」施永青對渡海泳沒有成績目標，「游到過去就得啦。」但計劃下年3月後不再渡海，即今年有機會是最後一屆，不知是否踏入從心之年，他轉頭改口風，「游到醫生唔肯寫紙為止。」
擁有億萬身家，富豪總有幾招養身之道傍身，施永青不認為游水是養生，對這個詞語更是失笑，「我做人嘅宗旨係盡性生活，特別要去養生都係負擔，朝聞道夕死可矣就得啦！人都係死路一條箒，養咩生，養極都死，點解要做啲徒勞無功嘅嘢。」
施永青不挑食亦是其生活態度，「咩都食，可以食嘅嘢，都對身體有益！」日日食炸雞都得？「我有食炸雞啊，油有脂肪，雞有蛋白質，點解唔食得？你一定係未試過冇嘢食，以前隔籬農場發雞瘟先有雞食，發瘟雞煮熟就得啦，化學雞就話唔食箒。」
記者：周家誠